Crónica

RUTA CAMIÑO VELLO DE ALDOSENDE

Nesta ocasión desprazarémonos ata Paradela, para desfrutar dun belo roteiro por esta parte da Ribeira Sacra de Lugo, camiñaremos a beira do encoro de Belesar.

Partimos de Aldosende e encamiñámonos ao primeiro miradoiro deste roteiro. Toca ir descendendo, por unha preciosa senda, rodeados de carballos, castiñeiros, érbedos, algún piñeiro. Ao chegar a esta magnífica terraza, podemos contemplar unha panorámica preciosa, iso si, o nivel de auga do encoro está baixo mínimos, podemos ver as marcas da auga cando o pantano está cheo, facémonos unha foto de grupo e continuamos o descenso, que desde aquí vólvese máis empinado, pero hai valos e cables para dar seguridade, xa que a senda é estreita e hai un gran desnivel. Ao terminar o descenso chegamos a unha zona de viñas aterrazadas, algo característico desta zona. Desde aquí acábase a pendente, camiñamos por unha camiño a nivel, con manto vexetal e continuamos desfrutando as vistas do encoro baleiro, o que nos permite ver os restos das construcións que o encoro asolagou. Chegamos ao Mosteiro de Santo Facundo, rodeado de viñas, hoxe en día está abandonado. O seguinte fito é a Adega, ruínas dunha adega antiga nun alto, o cal é atravesado por un túnel. Seguimos ata o miradoiro Adega dous Penedos, aquí decidimos abandonar o roteiro e seguir pola estrada ata o seguinte miradoiro, xa que imos un pouco tarde para chegar ao restaurante. Que vistas tan fermosas de Portomarin desde o miradoiro de Cabodevila e Penedo do Bico. Descendemos pola estrada ata o restaurante, alí está o autobús, onde poder quitar a suada. Tomamos algo antes de pasar ao comedor onde desfrutaremos unha exquisita comida.

Grazas a todos por facer posible un día máis, unha saída tan marabillosa.

Un saúdo.

Morís.