>  

Crónica

Ruta Cudillero – San Esteban de Pravia

Ben, para este mes de febreiro imos dirixirnos cara a terras asturianas, para realizar un roteiro costeiro; partiremos de Cudillero e terminaremos en San Esteban de Pravia.

O día amence nubrado pero esperamos que vaia abrindo, temos unha boa temperatura para camiñar. Arrincamos no peirao novo e dirixímonos ao seu casco, casas empolicadas pola saia da montaña, unhas sobre outras, creando unha bela estampa. Empezamos subindo polas suas callejuelas, estreitas, con chanzos, cara ao miradoiro da Atalaia, para continuar subindo ata o cemiterio. Imos vagueando ata o Pito, onde comezaremos a descender cara á praia de Aguilar, está a marea baixa, gozamos das formas caprichosas das rocas, estorbamos a sesión de fotos dunha voda e dirixímonos ao comezo do roteiro sinalizado, que nos levara ata San Esteban.

Toca subir, o chan é de cemento e pedra, rodeados de eucaliptos e piñeiros. Imos gozando das vistas que nos ofrecen, os numerosos miradoiros que atopamos ao longo do roteiro, magníficos cantís. O mar está un pouco axitado, ondas, escuma, que bela estampa. Así pasiño a pasiño chegamos á capela do Santo Cristo, que vistas tan impresionantes temos. Toca descender por máis de trescentos chanzos ata o espigón, onde están as piscinas de auga salgada, sitio elixido para finalizar o roteiro de hoxe.

Recóllenos o autobús e levános ao sitio elixido para a xantar de confraternidade, a tapería o Centro no Pito, onde nos espera a nosa recompensa, saborosa comida e bo trato.

Bonito día en gran compañía.
Grazas a todos e ata a próxima.

Morís.