Subida a Monte Castelo 2008

Un ano mais os amigos da asociación de sendeirismo Pasada das Cabras, de Burela, convidáronnos a participar na xuntanza anual de sendeiristas, con subida ó Monte Castelo e xantar de confraternidade na área recreativa alí situada. Somos 23 os participantes que partimos de Foz as 10 da mañanciña. Algúns viñan con paraugas e chuvasqueiros porque tiñan ben gravado na memoria a xornada do ano anterior, que choveu d'arreo.

O autobús deixounos diante da Casa do Concello, e alí nos entretivemos un bo anaco, disfrutando dunha excelente exposición de fotos antigas todas relativas a actividade pesqueira e portuaria de Burela. Para os mais vellos eran un recordo de outros tempos e de xentes coñecidas. Para os novos, que non viviron aqueles anos, espero que sirva para indicarlles de onde vimos e sirva de referente para saber onde estamos e cara a onde queremos ir.

Naquelas fotos recoñecemos persoeiros entrañables de Foz, vellos mariñeiros: Pelolelo, Julio de Castro, Amador ou Manolo de Lousas. Tamén os vellos camións Barreiros de Pescados Rey e un bo número de barcos que viñan refuxiarse o peirao de Foz durante todo o inverno. Alí nos fixo Ana a primeira foto do grupo, e dirixímonos cara á Praza da Mariña.

Aínda non chegara ninguén, así que aproveitamos para tomarmos un café, que amablemente nos serviu Marlén. Pouco a pouco foron chegando os diversos grupos participantes: Peña Furada, de Navia; As Bolboretas, de Xove; O Estoupo, de Luarca; e nós mesmos, Os Sendeiros, de Foz. Tamén había algún sendeirista participando de xeito individual, sen pertencer a ningunha asociación. En total 200 participantes.

Despois de facer a foto de grupo de rigor, nas escaleiras da Capitanía Marítima, iniciamos a marcha cando eran as once e vinte da mañá.

A primeira parte discorre polo paseo marítimo, do que este ano puidemos disfrutar en todo o seu esplendor xa que o sol nos acompañaba. Un mar azul inmenso, bonitas praias coma a de Portelo e A Marosa, e recoletas calas coma a do Ril. Despois de pasar a praia A Marosa seguimos un camiño que vai á sombra dos eucaliptos, ate chegar á Rúa do Vilar, onde cruzamos a carreteira, ben protexidos pola Garda Civil. Neste punto xa recorreramos 4,2 km.

Seguimos camiñando 500 metros por asfalto, pasamos a Fonte dos Caños e collemos un camiño, á dereita hai unha horta con un hórreo. Continuamos en ascensión e tomamos o Camiño dos Laxes, que nos conduce á Vila do Medio, bonito barrio con casas que teñen labradío, frutales, xardíns... un fermoso rincón de Burela.

Cando levábamos recorridos 5,5 km, chegamos á Fonte da Lamela, de abondoso caudal, e dende aquí iniciamos unha ascensión máis pronunciada seguindo un camiño entre eucaliptos que nos conduciría ó Cemiterio Municipal. E xa un derradeiro esforzo para subir a empinada costa que nos achegaría á meta: o precioso entorno da área recreativa do Monte Castelo.

Alí xa estaba todo preparado, as mesas postas baixo unha carpa, e inmediatamente nos sentamos para dar boa conta dos manxares deste xantar de confraternidade: empanada de chícaros, (así é como chamamos os de Foz ós berberechos), sardiñas asadas, churrasco, tarta de Santiago, café con gotas, e unha magnífica queimada.

Na sobremesa, charla distendida e sobre todo cantos. Hai que dicir que Cuello deu un recital de bo cantar asturiano, e que José Luís non puido resistir a tentación de cantarlle ó seu "Xixón querido, Xixón del alma"

Marabillosa xornada a que pasamos cos nosos amigos de Burela, Xove, Navia e de Luarca. Esperamos pasar con eles unha non menos marabillosa xornada en Setembro, no Encontro de Sendeirismo Río Ouro. ¡

Non faltedes o 20 de Setembro!

Ata sempre compañeiros,

David Méndez