Crónica

Ruta Senda do Oso.

Esta será a última saída deste mes de xuño, e desprazarémonos a terras asturianas, para facer o roteiro Senda do Oso, pero nesta ocasión eliximos comezala en terra de Quirós, na área de turismo activo do encoro de Valdemurio.

Aínda que a previsión non anunciaba choiva, a auga aínda que suave, acompáñanos ata case a metade do roteiro. Facemos a foto de grupo antes de comezar a marcha, xa nos primeiros pasos deste roteiro fácil, atopámonos con algo típico e abundante do roteiro, un túnel, debido a que esta discorre por un antigo trazado dun tren mineiro, e con eles sálvanse as montañas e desfiladeiros. Con paso tranquilo gozando da paisaxe seguimos a senda, ata chegar a Caranga de Abaixo, onde colleremos o desvío cara a Entrago, lugar onde terminaremos a marcha de hoxe.

A pesar da choiva imos gozando da camiñada, a paisaxe, o rumor das augas bravas dos ríos que bordeamos, dos paxaros que nos deleitan co seu agradable piar. Estamos rodeados dunha gran e exuberante vexetación, cun verde intenso, castiñeiros, carballos, faias, cerdeiras, nogueiras, debido á humidade. Facemos innumerables fotos, as vistas meréceno, túneles na montaña, pontes sobre o río, crestas respingonas de roca calcaria que rozan o ceo, e túneles de manto vexetal formados polas follas verdes, das copas das árbores. Non logramos ver ningún oso polas montañas, hai nubes baixas a intres, pero se logramos ver o voo de aves rapaces, aguias, voitres.

Río Quirós, río Trubia, río Teverga, desfiladeiro de Pedras Caídas, zona de escalada de Entrago, canto para ver e gozar, magnifico roteiro. E como colofón, unha rica e suculenta comida no restaurante Pena Sobia en Entrago.

Grazas a todos por vir e facernos pasar un día tan xenial.

Saúdos.

Morís