Subida ó Monte Castelo 2007

Este roteiro non forma parte da programación anual de Os Sendeiros, pero acudimos invitados por a Asociación de Sendeirismo Pasadas das Cabras de Burela. Quixeron que nos uníramos a eles os diversos grupos da Mariña, e asistimos xente de Os Sendeiros de Foz, (45 persoas) de Ribadeo, de San Cibrao, de Xove, de Morás e de Viveiro.

Algo máis de 200 sendeiristas congregámonos na praza da Mariña, guarecéndonos da choiva baixo os soportais. Algúns aproveitamos para mercar paraugas en algún bazar chinés. Mirábamos ao ceo con desesperación, xa que non tiña trazas de escampar. Un grupo de gaitas facía grandes esforzos por mantermos animados.

Por fin as doce menos cuarto, xuntámonos para facer a foto de grupo, a ás menos dez comezamos a camiñar inda ó abrigo dos paraugas e chuvasqueiros. Diriximos os nosos pasos cara ó paseo marítimo, que tomamos á altura da Praia do Portelo e camiñamos rente ó mar cara a Praia da Marosa. O paseo é agradable neste tramo chan, e a auga non nos impide disfrutar da súa beleza. A emblemática Pedra Burela, onde se asenta o faro, acaparou as miradas de admiración e respecto de cada un de nos polo que ten de significado para as xentes desta costa mariñán.

Cando nos íamos aproximando a Praia da Marosa xa apenas chovía e os grandes claros substituíran ós nubarros. Así pasamos pola Casilla, cruzamos a carreteira, e seguimos cara o Vilar. As pendentes fixeron que empezaramos a suar, e todo o mundo se desprendeu dos chuvasqueiros. Por un anaco, pois tivemos que ir poñendo e quitando prendas de continuo. Collemos en ascensión polo Paseo dos Romeos e seguimos polo camiño Real. Camiñamos un anaquiño rente a carreteira de circunvalación ate que a cruzamos por debaixo mediante un pequeno túnel.

A partir de aquí seguimos en ascensión suave por un camiño que discorre entre plantacións de piñeiros e eucaliptos. A subida é leve ata chegar ó cemiterio, pero a partir de aquí atopámonos con unha pronunciada pendente ate chegar ó cume do Monte Castelo, onde se atopa unha fermosa área recreativa. Xa na subida podemos admirar incomparables vistas de toda a costa da Mariña. Burela agrúpase ós nosos pes, e adiviñase una vila con actividade febril no porto, nas diversas industrias e tamén nos servizos, como o Hospital da Costa e os diversos centros de ensino de primaria e secundaria. Cara ó Oeste podemos ver San Cibrao e a factoría de Alcoa.

Na area recreativa, dotada con fonte, servizos hixiénicos, barbacoas, e mesas, chama a atención unha bonita capela de nova planta, levantada na honra de Nosa Señora das Marabillas. Non cabe dúbida que este é un fantástico lugar para pasar un día de lecer en familia, con toda a beleza do monte e as vistas da costa, e ó mesmo tempo tódalas facilidades que ofrece esta área á que se pode acceder facilmente con coche.

Os nosos amigos de Burela traballaron arreo e sorprendéronnos con un gran despregue loxístico para prover a todos e cada un dos sendeiristas de unha pantagruélica comida composta de sardiñas asadas, cachelos, churrasco, chourizos criollos e galegos, empanada de bacallau e de bonito saborosísimo pan e, para regar todo ilo, viño tinto coma nunha malla e cervexa de barril a esgalla. Non faltou nin o café, de manga, que houbo para todos en abundancia. Nin tampouco unha magnífica queimada, ben remexida polo noso bo amigo Graciano.

Na sobremesa cantouse, bailouse e aínda tivemos tempo para a conversa amigable. A Asociación Os Sendeiros de Foz queremos agradecer a Asociación Pasada das Cabras por habernos permitido disfrutar tan intensamente deste día na compaña de tantos amigos. Tamén queremos felicitalos pola inmellorable organización, tanto da ruta como da entrañable festa que compartimos. E unha felicitación moi especial para o seu presidente, Alfredo Llanos, que dende o sábado é o novo Alcalde de Burela. Noraboa.

Esperámosvos o 15 de Setembro na Xuntanza que os de Foz faremos na Ruta Río Ouro.

David Méndez.