Crónica

Un ano máis Os Sendeiros fomos invitados polos nosos amigos da “Pasada das Cabras” de Burela a pasar unhas horas xuntos.
Ás 11 da mañá comezamos dende a praza da Mariña o percorrido, non sen antes facer a foto do grupo que integrábamos os camiñantes. De Navia, Xove, Foz e de Burela formábamos un grupo dunhas 200 persoas que íamos a facer a aventura.

Saímos este ano camiño do porto á beira das ocas e patos que habitan ceivas polo porto.
Seguimos a ruta collendo a dereita unha escaleira un pouco empinada que nos achega ás primeiras casas para ir levándonos a un fermoso paseo cunhas vistas fermosas do grandioso porto, os asteleiros de Armón e o inmenso mar. Poucos barcos teñen atracados, a costeira do bonito manda. O paseo vai pola parte baixa de Burela á beira do mar e, achéganos a zona residencial O Cantiño, tendo como fondo as praias da Areoura e Alemáns do concello veciño de Foz que fan unha paraxe envidiable.

O paseo pon fin no Perdouro, cruzamos a estrada xeral N-634, e collemos unha senda paralela á circunvalación que pouco a pouco lévanos polo medio do monte con uns repeitos máis ben duros que a máis fainos tomar alento. O camiño vai polo medio da sombra que co día de sol que tivemos era de agradecer.

Na subida coma sempre o grupo íase estirando cada vez máis e as suadas eran boas, soamente bastaba ollar as faces da xente. O humor non faltaba.
Este encontro e de amizade, de ano a ano volvemos a vernos xente coñecida que cada ano son máis os lazos que nos van unindo.

Encaramos o derradeiro para por fin achegarmos, ao Monte Castelo, un área recreativa fermosa, ten unha bonita capela na Honra da Virxe das Marabillas. Unhas vistas fermosas, podemos recrearnos co mar e coller coa man o pobo de Burela, moi ben coidada, bancos, mesas, en fin un lugar para pasar un bo día en familia.
Na chegada a organización ofrece a os camiñantes cervexa, refrescos, empanada que agradecemos moito pola sede e fame que tíñamos algúns. Eran as dúas e había que esperar ata a media para o xantar, mentres, as conversas, as dixitais, as anécdotas do día.

O día era espléndido para a xuntanza, unha carpa ampla tíñamos para o xantar, a hora en punto abriu as portas e sorpréndenos as mesas ben presentadas para facer máis. Empanada de carne e bonito churrasco, e todo elo regado co bo viño da terra, de postre un milfollas, café e alegría e de remate baile amenizado por Xoán de Valadouro que nos deleito con rumbas, pasodobres, cumbias, que ninguén quedou sen botar uns bailes.
Foi un gran día de sendeirismo e compañeirismo que pasamos no Monte de castelo de Burela.

Felicitar coma sempre a os amigos do grupo Pasada das Cabras de Burela por facer que pasáramos un día tan agradable. GRACIÑAS.
Ata o ano que ven.

Manuel Pérez