Crónica

Belén de Cumes 2020, Cornería.

Un ano máis, imos instalar o noso Belén na cima dunha montaña, nesta ocasión será en Cornería.

Concentrámonos diante da capela do Carmen de San Martiño, fai un bo día para camiñar, cando xa estamos todos, separados e con máscara como marcan os protocolos anti covid, damos unhas breves instrucións e comezamos a marcha de hoxe. Toca ir subindo aos poucos ata o cume onde quedará depositado o Belén todo o nadal. O roteiro é cómodo por pistas amplas de terra, saburra e herba, con pendentes suaves que nos achegan á cima, imos rodeados de eucaliptos e piñeiros. Durante a marcha gozamos das magnificas vistas da costa, de volver vernos despois de tanto tempo, debido á pandemia, e así aos poucos coa alegría dos nosos máis novos camiñantes, coas súas risas xogos preguntas e bromas van pasando os pasos, e chegamos á cima. Pasamos baixo unhas árbores e montamos o Belén xunto ao vértice geodésico, son os nosos pequenos camiñantes os encargados de colocar as figuras á súa maneira.

Unha vez instalado, feitas unhas fotos do mesmo, xuntámonos, deixando distancia para con sidra achampanada, brindar polas festas e desexar que o próximo ano sexa mellor que o que está a piques de terminar. Colocámonos para facer a nosa foto de grupo coa costa como fondo, e comezamos o descenso ata o punto de partida polo mesmo camiño que nos trouxo ata ó cumio.

Bonito día, para camiñar en tan grata compañía, gozando da natureza e a alegría dos nosos máis novos membros, que pracer camiñar ao seu lado.

Boas festas.

Grazas a todos e ata a próxima.

Un saúdo.

Morís.