Crónica

Rutas Semana Santa 2015

Nesta ocasión e aproveitando os días festivos que propicia a semana Santa, decidimos facer dúas rutas distintas unha o venres e outra o sábado.

Para o Venres eliximos a ruta das capelas, saímos de diante do concello e dirixímonos polas rúas de Foz ata o campo municipal de fútbol, alí collemos o paseo de Malates ata a fonte do souto en Mañente, dende este punto pasamos baixo a estrada xeral e subimos por unha pista ata o cemiterio de Vilaronte, para pasar por diante da igrexa desta parroquia, e camiñando polas súas rúas fumos subindo ata a capela do Carme, que se atopa na parroquia de San Martiño, lugar elixido para facer unha paradiña e repoñer folgos. Xa co bandullo cheo, encaramos camiño cara a Basílica menor de San Martiño, para logo encarar a subida a capela do Bispo Santo, onde ollamos unhas fermosas vistas de Foz e recuperamos o alento despois da subida. Neste punto iniciamos o descenso cara a capela de San Blas, xa en Vilaxoane, e dende aquí hacia o peirao de Foz diante da igrexa parroquial onde puxemos fin a ruta de hoxe.

O sábado decidimos facer unha ruta que pasando polo Castro de Marzan nos achegou de novo a capela do Bispo Santo, onde fixemos a foto de grupo, para logo encarar a subida cara o Pico da Lebre, pero sin chegar o cumio, na metade collemos a pista que bordeando esta montaña, nos a acercar a Fazouro. Na Obra Pia de Fazouro, fixemos a parada para comer, beber e descansar un pouquiño. Dende aquí seguimos a ruta das praias que bordeando o litoral nos levou a Foz, a praia da Rapadoira, lugar elixido para poñer o punto e final a este día. Decidimos poñerlle o nome de Ruta dos Nazarenos, por estar na Semana Santa e parecer que iamos en procesión.

Un saúdo para todos os que nos acompañaron e fixeron que o día fose moi agradábel.

Morís.