>
Crónica
Ruta da Cangrexa
Para este roteiro
do mes de decembro dirixímonos a
terras asturianas, á contorna de
Luarca, onde faremos o roteiro
costeiro, da Cangrexa.
Concentrámonos xunto ao
restaurante Canero, despois de
equiparnos, comezamos a camiñar
en dirección á praia da Cova,
seguindo o curso do río Esva. Xa
na praia collemos o carreiro que
bordeando a costa en dirección
oeste, faranos gozar das
magníficas vistas. Desde o alto
do cantil vemos á nosa dereita o
cabo de Busto e pola nosa
esquerda, por onde camiñaremos
hoxe a costa ata Luarca.
Baixamos á primeira das praias
que visitaremos, a praia dos
Muíños. Toca subir de novo ata a
parte alta destes impresionantes
cantís, para continuar ata a
praia da Polea. As subidas e
baixadas ás distintas praias
están protexidas por eucaliptos
e piñeiros facendo unha bonita
senda. Chegamos á praia de Chao
para continuar ata a de
Portizuelo, onde faremos unha
pequena parada para comer algo e
repoñer forzas. Subimos por un
belo carreiro de piñeiros
eucaliptos, castiñeiros e
carballos, tapizados por un
manto de follas caídas e musgos
moi verdes, que fan máis alegre
a subida ata Barcia. Desde aquí
tomamos rumbo este cara a
Caroyas, para coller o camiño
polo que subimos á primeira hora
da mañá e dirixirnos cara a
Canero e ao restaurante onde
comezamos o roteiro de hoxe.
Facemos a comida de final de
roteiro no restaurante Canero,
moi rica comida por certo, e cun
brinde para felicitarnos o
próximo nadal poñemos o punto
final ao día de hoxe.
Grazas a todos e ata a próxima.
Un saúdo.
Morís.