>  

Crónica

Rota Gran Senda do Navia, Illano.

Nesta saída dirixirémonos a terras asturianas, ao concello de Illano, para participar no día do senderista de Asturias e na marcha reivindicativa da Gran Senda do Navia.

Concentrámonos no punto de partida, na subida ao castro de san Isidro, na zona das Mestas. A pista vai subindo, rodeados de piñeiros, o piso está moi ben. Camiñamos baixo a choiva e imos subindo, serpenteando, é unha pena que non podamos gozar das vistas destes vales e picos, xa que as nubes e a choiva tápannolas. Chegamos a un alto onde hai uns depósitos de auga e comeza un suave descenso ata A Montaña, onde está instalado o avituallamiento, dannos unha bolsa ben completa. Desde aquí toca subir ata o punto máis alto do roteiro de hoxe, e neste andar comeza a nevar. Aquí comeza o descenso cara a Cimadevila, o carreiro vólvese máis estreito, máis irregular, rodeados dunha vexetación máis exuberante e frondosa, coa auga correndo polo camiño, para seguir baixando ata a área recreativa de Folgueirou, onde remataremos o roteiro de hoxe.

No restaurante da área recreativa terá lugar a comida de confraternidade, moi saborosa e abundante por certo. Estando todos alí reunidos as autoridades dan unhas palabras. E pechamos o día con música e baile.

Grazas a todos por facer posible este día.

Ata a próxima.

Morís.