>  

Crónica

Andaina de verán: Rota circular Montes da Lebre

Para este último roteiro do mes de xullo, faremos un roteiro circular polos montes da Lebre, partindo da capela do Bispo Santo.

O día amence chuvioso, a previsión meteorolóxica cumpriuse, é unha choiva miúda, moi fina, un suave calabobos, que ten o ceo cuberto e non nos permite gozar das vistas panorámicas. Concentrámonos diante da capela, damos unhas breves explicacións do roteiro de hoxe e comezamos a camiñar, baixo os paraugas de distintas cores. Os primeiros pasos son sobre asfalto, ascendendo ata media ladeira, onde colleremos a pista de saburra que atopamos á nosa dereita. Temos un bo tramo chairo por unha pista con bo firme, rodeados de eucaliptos, e coas nubes baixas que temos, non podemos disfrutar das vistas panorámicas. Agora toca unha pequena subida, para logo volver a llanear un bo pedazo e así recuperar, antes da última subida, ata á canteira no punto máis alto de hoxe, onde faremos unha parada para reagruparnos e así comezar o descenso todos xuntos. Collemos á dereita a estrada de Santa Cecilia, e na primeira pista de saburra pola nosa esquerda, desviámonos e comezamos a camiñar por camiños de monte, rodeados de eucaliptos, pasamos varios arroios que invaden o camiño, esquivamos grandes charcos e procuramos non engancharnos en toxos, silvas e ramas ao esquivalos. Así chegamos á estrada que une o Bispo Santo con San Martiño, a cal collemos á nosa esquerda, para chegar ao lugar de partida.

Grazas a todos por participar neste día chuvioso.

Un saúdo.

Morís.