>  

Crónica

Ruta Vegadeo – Abres, ruta estraperlo.

Estreamos o ano por terras asturianas, dirixímonos a Vegadeo, para realizar o roteiro do estraperlo entre Vegadeo e Abres.

Concentrámonos diante da igrexa de Vegadeo, nunha mañá chuviosa. Unha vez equipados comezamos a andar, estes primeiros pasos son sobre asfalto, imos subindo camiño de Miou, pasamos xunto á ermida de santa Leocadia. Desde aquí descendemos por unha pista de saburra ata a beira da ría, o paseo de madeira que discorre pola marisma, está inutilizado e temos que camiñar por un carreiro paralelo, chegamos a unha área con miradoiro de aves, e comezamos o ascenso a Lourido. Facemos unha parada para repoñer forzas, degustando un delicioso biscoito feito por Marilo. Para de chover e seguimos camiñando, a partir de aquí o camiño é costa abaixo cunha pendente moi suave. O camiño é de saburra, ten numerosos charcos, que nos obrigan a facer zigzag, para esquivalos, imos rodeados de eucaliptos, algún piñeiro e cando atopamos un monte cortado, temos unhas vistas preciosas do ría.

Cando chegamos a Abres loce un sol espléndido, e a temperatura é magnífica, dirixímonos a Casa Barbeiro, onde nos espera o bus e onde faremos a comida de confraternidade, por certo moi saborosa.

Grazas a todos por este magnífico día.

Ata a próxima.

Saúdos.
Morís.